Eau de parfum Tiffany & Co.

Последен парфем кој ми остави многу силен впечаток: Eau de parfum Tiffany& Co.

Силен почеток на горните ноти на зелена свежина, која силно потсетува на цитрусна мандарина, а всушност е само екстракт од гранче на мандарина.

Долго се чувствува почетокот, кој иако избледува со развојот на мирисот, сепак е срамежливо и постојано присутен и во средината, која пак, е едноставна, и составена само од еден цвет - Ирис.

Добитна комбинација.

Впечатокот е подвлечен со постојаното присуство на заводливиот мошус, состојка која дава неодолив шарм штом еднаш се нанесе на кожата. Патчули е уште една состојка употребена во потписот на оваа креаторска куќа.

Штом дојдов во допир со овој мирис, неодоливо ме освои дизајнот на шишенцето, кое како да е анатомски создадено да се лизне во вашата дланка и да остане таму. Формата која потсетува на дијамант пак, од своја страна, дава неодолива елеганција и симболизира престиж. 

Тиркизната боја само го дополнува целото искуство, асоцирајќи на академски висини, морска смиреност и елеганција. 

Сигурна сум дека штом еднаш ќе се најде на вашиот рафт, долго време нема да го замените со друг.

Пролет 2018 Eros Eau de Toilette Versace

Eros eau de toilette for women. Изненадува понудата на оваа линија. Успешната композиција на машкиот парфем, испровоцира женска линија со веќе два успешни парфеми Perfume и Eau de Toilette.

Ако сте во зенитот на летото, и морате да се носите со неподносливата горештина на силното сонце, сигурно секоја втора мисла ви е посветена на можните начини на освежување.
Токму овде можете да го најдете решението.

Силниот мирис на сицилијански лимон и мандарина, се чини како да успешно се интегрирани во базата на оваа композиција. Иако карактеристични како врвни ноти, нивното присуство е нагласено и доминира низ целиот развој на парфемот.

Успешно решение во стилот и потписот на Versace - забележлива екстравагантност, која започнува со впечатлив настап уште на самиот почеток. Нежното присуство на букет скромни нежни ноти од фрезија, цвет од портокал и јасмин ја дава летната свежина на тивкиот ветрец кој пирка покрај крајбрежјето на морето...
Базата, карактеристична за Versace, не проаѓа ако нема мошус, патчули и бели дрвенести ноти, кои овојпат се дополнети со амброксан.

Не сакам да компарирам различни дизајнерски куќи, но морам да кажам дека оваа верзија страшно ме враќа и потсетува на Light Blue D&G. Ненадминливата едноставност на свежина која може да ја даде еден парфем, ја имплементираат сите креаторски куќи.

Eros е решението на Versace.
Уникатно и многу успешно.

Версаче 2018 - Мистичниот Crystal Noir

Магичната необјаснива привлечност на мистичниот мошус и букет во Crystal noir плени со својот полн сјај буквално секојпат кога имам шанса да го користам овој парфем.

Гламур достоен за дама. Дневен јак впечаток за деловна жена или ненаметлив суптилен додаток за вечерни настани.

A must have.
Комбинација на неодоливи сензуални ноти која ќе ве плени уште од првата средба.

Целата елеганција на вечерната тоалета дополнета со овој мирис, дава истакната сензуалност на женственоста, и остава незаборавлив впечаток долго потоа...

Идеално искомбинирани мошусови ноти, капки есенција од расцветани рози, допир свежина од ориентот... мистичност... За храбрите жени кои се моќни заводнички.

Сакате силен потпис? Ова е мирис кој нема да ве изневери!

Пролет 2018 со Versace

Dylan Blue. Новитетот на оваа дизајнерска куќа. Сосема достоен претставник на потписот на Версаче. Истрајниот тивок акцент на воздушести ноти од бели пупки на јасмин и петалија, дополнети со цвет од детелина, целосно ја нагласува пролетната инспирација на оваа композиција. 

Откако нотите ќе се развијат и првичниот впечаток на лесен ветрец треба да избледи, пролетта сеуште останува нагласена во срцевината на мирисот. Ги полни сетилата со силно присуство на расцветани пролетни цветови, подвлечени во база со дрвенести ноти и бел чај...

Овошкастиот мирис на зелено јаболко и само капка присутна праска ја навестува заводливоста, истакната со белиот мошус... Романтична и заводлива, но само откако ќе ве навлече со својата скромност... Неповторливо искуство.

Има тука уште нешто. Таинствено и интригантно, а со толку отворен настап. Styrax - дефинитивно состојка која не можев лесно да ја препознаам, а е присутна низ целиот развој на овој мирис. Составен дел од базата, ја носи основната карактеристика за препознатливост на неговата уникатност.

Индиго сино шишенце за впечатлив декор на рафтот. Класа.

Осврт на Рефан 193

Мирис кој слободно можеме да го вброиме во групата на "класици" меѓу мирисите. Неодоллив, допадлив мирис, срамежливо и постојано присутен, мирис кој го одбележува Вашето присуство на ненаметлив начин.

Светлата композиција е составена од бели цветови и деликатни зачини. Нежните пудрести ноти на фрезија, лушпа од праска, пеонија и бел мошус водат кон срцевината на мирисот составена од бели цветови, иланг-иланг и роза.

Базата е составена од дрвенести лесни енергетски ноти од свежо мелени зрна на кафе и допир на темјан за сензуалност. Како нежен шепот, женствен и суптилен, лесен, со забележливо присуство. 

Главни акорди на овој мирис се цветни, мошусни, зелени и балзамични ноти, дополнети со дрвенести ноти и топли зачини.

Нежно ориентален парфем кој е неопходно решение за секоја суптилна и сензуална дама.

Денот со мирисот на Refan 324

Кога денот ми започнува со изобилство на енергија, а сакам да го поминам лежерно и расположено, можам да го носам овој парфем...
Се отвара меко и нежно, со доминантна и истовремено ванилеста нота на почетокот, која се задржува долго време...сакам да ме опкружува и ме топли секојпат кога ке земам здив, иако свежото ладникво време ме тера да седам облечена во палто...
Мирисот на суво овошје и бели цветови се меша и мириса како испарувањето на топол овошен чај засладен со ванила...смирува и успокојува. Неверојатна ароматерапија.

Многу пријатна комбинација, како целта на создавањето на овој парфем да бил исклучиво добитна комбинација, селебрити стил, мирис на кој секој што ќе го мирисне позитивно ќе реагира.

Дрвенестите ноти започнуваат да се чувствуваат после првиот бран на врвот, но сеуште како бледа сенка покрај слатката ванилеста доминација.
Длабоко мистериозен и истовремено срамежлив, слаткасто карамелен со сушено овошје, ориентално инспириран иако не целосно нападен, со присуство на роза која дава силно тешко но и свежесто присуство.
Има комбинација на цветови како да се измешани свежиот Клое и цветниот Кензо со основа на слатка Ванила...тежок парфем во лесна варијанта, превзема доминација со своето постојано и силно присуство. Ова е парфем кој или ќе го сакате или нема. Не е парфем за сечиј вкус, иако така ветува на почетокот.

Понекојпат парфемот мора да се адаптира на кожата, а овој е баш ваков вид на мирис...ако се развие хемијата со вашата кожа, можеби сте го нашле вашиот авторски мирис. Мора да се проба неколкупати - во различни расположенија - за да го дознаете тоа.

На мене денеска совршено стои, идеално ме успокојува и грее.

Мирисна инспирација Рефан 136

Цветен букет со ориентални ноти.

Мирисајќи го овој парфем, го доживувам моментот на свеж летен воздух во просторија полна со букет летно цвеќе, шарени бело-розеви цветови штотуку набрани од градината. Пиркањето на лесниот ветрец носи мирис на калинка и слаткасто овошје. Смиреност која дава енергија за остатокот на денот.

Лесен, ненаметлив, но јасно изразен парфем го изразува дружељубивиот карактер на расположени енергични личности.

Тропското овошје јузу и калинка се главната приказна на овој парфем. Мешавината со бело цвеќе, розева магнолија и лотус даваат пријатно ненаметливо чувство на пријателство и расположение, дополнети со заводливоста на бел мошус, топол летен морски бран, амбер и махагоново дрво.