Saturday, September 14, 2013
Мирисна инспирација Рефан 136
Мирисајќи го овој парфем, го доживувам моментот на свеж летен воздух во просторија полна со букет летно цвеќе, шарени бело-розеви цветови штотуку набрани од градината. Пиркањето на лесниот ветрец носи мирис на калинка и слаткасто овошје. Смиреност која дава енергија за остатокот на денот.
Лесен, ненаметлив, но јасно изразен парфем го изразува дружељубивиот карактер на расположени енергични личности.
Тропското овошје јузу и калинка се главната приказна на овој парфем. Мешавината со бело цвеќе, розева магнолија и лотус даваат пријатно ненаметливо чувство на пријателство и расположение, дополнети со заводливоста на бел мошус, топол летен морски бран, амбер и махагоново дрво.
Monday, July 29, 2013
Мирисна инспирација Рефан 121
Оваа карактеристика го одредува составот од лесни цветно-цитрусни мешавини на мириси, со зашеќерени овошја.
Уште при самото нанесување на овој мирис Ве заплискува лесна арома на бело јаболко измешано со свежи цирусни ноти на лимета и лимон......Но срцевината се изразува со благи чоколадни мириси и ароми на ванила, кои ве внесуваат во слатка приказна исполнета со безгрижност, топлина и фантазија.
Кедарот и белиот мошус како основа на овој парфем, присутни за цело времетраење на аромата, ја дополнуваат приказната со мекост и неодолива сензуалност.
Лесен парфем кој ќе го дополни денот со многу инспирација и енергија!
Thursday, July 25, 2013
Мирисна инспирација Рефан 140
Мешвина на ноти од јаболко и лимон опива и инстантно дава енергија. Жолтата фрезија, егзотични овошја, сандалово дрво и мошусот креираат неодоливост, женственост и заводливост секојпат кога повторно ќе вдишите од свежината.
Акватична нота на Рефан 140 дава дополнителна леснина кога го носите овој парфем.
Вистински летен избор за посебно топлите денови. Не само што освежува, туку и дополнително ги полни батериите за да го издржиме напорот на секојдневието.
Моментот на мошус креира неодоливост, а сандаловото дрво и кедарот, толку тивки, со своето ненаметливо присуство го дополнуваат колажот на прекрасни чувства кои ги предизвикуваат.
Прекрасен мирис! Сакам СЕ во врска со него.
Wednesday, July 17, 2013
Мирисна инспирација Рефан 320
При самото нанесување Ве заплискува свежо - слатка комбинација со додаток на пудрести ноти. На прв впечаток Ве освојува мирисот на слатки цреши изблендирани со слатко-горчливи бадеми и бергамот. Мала нијанса на црвени рибизли му додава специфичен мирис на почетокот.
Аромата на сладок корен освојува на прв впечаток, и трае долго до крајот. Можеби засилен со слаба ванила во комбинација на водени ноти на темен чај. И нежен цветен букет од рози и ирис.
Бергамотот останува да биде доминантен и сеуште трае дури и после средните ноти.
Свеж, мистичен и воодушевувачки мирис.
Многу веројатно е дека многу девојки ќе се пронајдат во овој мирис, но сеуште стои општопознатото правило - дека еден ист мирис може различно да мириса на различна кожа - затоа најпрво пробајте го, и потоа одлучете дали е ова Вашиот парфем.
http://all-free-download.com/
Thursday, July 11, 2013
Мирисна инспирација Рефан 180
Friday, July 5, 2013
Мирисна инспирација Рефан 246
Почетниот морски мирис кој како топол морски ветер го носи мирисот на свежите портокали моментално враќа спомени од некоја пријатна прошетка покрај плодови дрвја.
Петитгранот ја дефинира свежо-цитрусната луткаста нота која не доминира но одлично ја дополнува морската свежина со моментот на мирисни мандарини.
Почетната презентација во следните петнаесетина минути преоѓа во лесна смиреност која ја дава мешавината на лаванда со бели нежни цветови. Релаксираноста предизвикана од лавандовиот мирис се дополнува со лесни дрвенести ноти и ноти на благ слаткаст земјен амбер.
Дефинитивно препорачувам за да дополните малку свежина во летото!
Пробајте да видите како овој мирис ќе се адаптира на вашата кожа, и оставете коментар за вашето мислење.
Wednesday, July 3, 2013
Мирисна инспирација Рефан 173
Ориентална ванила која останува доминантна нота од почетокот до крајот. Опкружувањето на почетокот го сочинуваат кокосови ноти кои некако стануваат доминантни после првиот впечаток. Ублажени со мирис на бадеми, овој мирис се задржува со истата комбинација до крај. Присутните неодминливи цветни ноти на рози се чувствуваат неприметно, колку да додадат на еуфоријата која се чувствува со ванилата и кокосот.
Ова е еден од оние мириси на кој човек "се навлекува". Иако можам да го категоризирам како "зимски", одлични емоции предизвикува секогаш кога ќе го нанесам, дури и летно време. Сепак, само во летни и свежи квечерини, кога топлината од воздухот започнува исчезнува.
Заводлив мирис, кој секојпат кога ќе го ставите - сигурно ќе добиете позитивни комплименти за изгледот и аурата со која зрачите!
Monday, July 1, 2013
Мирисна инспирација Рефан 189
Започнува со остра цитрусна нота која потсетува на лимета - горчливо цитрусен мирис. Неодолива нота која прави моментално да се почувствувате освежено иако надвор температурата можеби е неподносливо висока.
Во првите 10-15 минути го задржува истиот мирис и дури потоа започнувам да ги чувствувам белите цветни ноти како јасмин и бели рози. тука се но толку ненагласени, само ја оомекнуваат острината на почетниот и сеуште силен цитрус. Мошусот и нежен амбер е моментот на мирис кој се задржува дооолго по нанесувањето, и заедно со сеуште присутниот и доминанетн лимон го прават неодолив и секојпат интересен.
Летен мирис дефинитивно. Мислам дека дури и да се размислувате што да одберете за подарок, многу мала е веројатноста да згрешите ако го одберете токму овој парфем.
Темјан
Го сакате ли мирисот на темјан? Најчесто се користи во религиозните обреди, и многумина имаат различен став за темјанот баш затоа. Сепак, како силна составна нота во мирисот, го има во некои парфеми. Сигурно не сте ни помислиле дека можеби го има баш во вашиот парфем.
Доколку користите некој од овие паргеми, вие сте фан на оввој мирис. Проверете!
Obsession Calvin Klein (women) (амбер зачини и темјан)
Kenzo Amour (како топ ноти ги има ванилата и темјанот)
Gucci Homme (темјан)
Tom Ford women (после чоколадото и бели цветчиња, доаѓа мирисот на темјан измешан со ванила и зачини)
Loewe 7 Men (темјан со дрвенести ноти на ветивер и црн бибер)
Thursday, June 27, 2013
Правилно нанесете го својот парфем
Ставете малку од мирисот на пулсирачките точки на Вашето тело - на дното до дланката или внатрешниот дел на раката под лактот. Ова од причина што овде имаме повеќе топлина на телото и мирисот побрзо се развива, па така веднаш ќе можете да уживате во развојот на парфемните ноти. Втријувањето на мирисот на кожата, иако многумина го практикуваат - сметам дека е погрешно - најдобро е да распрснете и оставите да се исуши по природен пат. Вака ќе ја задржите хемијата на парфемот со тоа што правилно ќе се распределат мирисните молекули на кожата.
Кога ставате парфем, распрснете го од далечина од 10-15 сантиметри. Ова сепак зависи и од јачината на мриисот, па така, ако користите многу силен мирис, оваа далечна може да се зголеми, или соодветно, да се намали ако ставате некој лесен мирис.
Нанесете го на претходно подготвена чиста кожа. Доколку имате безмирисен лосион за тело, нанесете малку од него, зашто добро хидрирана кожа многу подолго го задржува мирисот отколку сува кожа. Уште подобро, доколку веќе сте се решиле да користите еден парфем, нанесете парфимиран хидратантен лосион со истиот мирис - ова во голема мера ќе ја продолжи трајноста на вашиот омилен парфем.
И најважно, не нанесувајте парфемна вода на веќе испотена кожа. Најдобро е да нанесете после туширање. Затоа, веднаш под туш, па потоа - дотерувајте се...:)
Tuesday, June 25, 2013
Мирисна инспирација Рефан 226
Веднаш по нанесувањето ве заплискува со цитрусна свежина на лимон зачинет со бело цветче на јасмин. Свежа енергија која и во најтоплиот летен ден ќе ви вдахне енергија за да здивнете и добите нов наплив на сила.
Откако ќе се сталожат првите ноти, после 10-тина минути, остануваат да лебдат во просторот мирисни молекули на зачини и лесни цветови, токму толку, колку што е потребно за да оставите впечаток на енергична личност, модерна, софистицирана и елегантна.
Дрвенестите ноти од амбер и пачули кои остануваат да траат долго потоа, оставаат незаборавен потпис на вашето присуство.
Тука некаде, цело време се присутни акватичните ноти, кои го прават овој мирис да биде лесен и прифатлив за повеќе вкусови. Мал допир на бел мошус остава забележлива трага која секој што има истенчен вкус ќе ја примети. Заради овој момент, можете да бидете сигурни дека ќе добиете позитивни коментари од повеќе ваши пријатели (и пријателки, се разбира :) )
Младешка елеганција која кога ќе ја искомбинирате со темен костум, елегантни чевли, и светла кошула, ќе бидете впечатливи помеѓу луѓето, и ќе се чувствувате непобедливо на секоја деловна средба.
Saturday, June 22, 2013
Како да изберете парфем според изгледот?
Wednesday, June 19, 2013
Мирисна инспирација РЕФАН 017
После првите три минути, останува првиот впечаток да лебди помеѓу слаби цветни нежни и ненаметливи ноти. И штом си помислив дека е еден од оние мириси кои имаат само една мирисна линија, која од почеток до крај е иста, се издиференцируваат цветни ноти на зачинет босилек, пријатен мирис на роза и момина солза или јасмин.
Зеленикава нежност на парфемот се отсликува со топли ноти на крајот. Кога ќе го дочекате развојот на парфемот, всушност ќе Ве прегрне со цветно-цитрусна композиција која ќе ја обожувате.
Парфем за жени од сите возрасти.
Tuesday, June 18, 2013
Мирисна инспирација ,Рефан 100
Мирис кој веќе цела недела ми е фаворит број 1.
Се отвара со пудреста свежина која ме тера да го задржам здивот што подолго за да го чувствувам мирисот што подолго. И повторно вдишувам со полн здив. Прекрасно.
Посебна свежина ми додава кога мирисот се шири околу мене во овие жешки денови. Веројатно бидејќи ме потсетува на утринско свежо ветре што пирка покрај плажа носејќи го мирисот на испарената езерска вода, измешан со мирисот на букетот свежи цвеќенца од нежни рози и бели цветчиња.
После неколку минути, станува поблизок мирисот на букетот цвеќе, а започнува да се меша со примеси на амбер кој доооолго потоа го чувствувам секогаш кога ќе поминам со раката покрај главата.
Лесен мирис кој може да се комбинира со лежерен стилски изглед, а подеднакво успешно и со строг "office wear look" за денови исполнети со тешка спарина во воздухот.
Мирисите влијаат на расположението и здравјето
Во суштина на природата е да се поврзуваат сетилата со звуци, боја, светлина, мирис, за да може еден обичен човек да се чувствува целосно и да ја има целата слика на моменталното опкружување пред себе.
Веројатно малкумина од нас сваќаме колку е важно за нас да мирисаме. Но, се разбира, секој сака да мириса добро и да оддаваме само пријатни мириси. Е, сега пак, исто така малку луѓе знаат дека мирисот може да ни предизвика депресија, да го влоши расположението, да предизвика замор и раздразливост. Некои мириси ја зголемуваат ефикасноста, додека други напротив ја намалуваат.
Светот во кој живееме е исполнет со пријатни мириси. Тие се насекаде околу нас, иако тие не можат да се видат или допрат. Тие имаат лековит ефект врз телото, можат да се користат за подобрување на благосостојба на организмот, расположението и состојбата на умот.
Научните истражувања покажуваат дека одговорот на телото на синтетички и природни мириса сосема поинаква, дури и ако оваа разлика не се чувствува со помош на нашето сетило за мирис. Тоа е многу важно за секого.
Однадвор, односно мирисот - може да биде ист, но, парфеми, врз база на синтетички компоненти ни даваат само мирис, додека парфеми на природна основа - делуваат со ароматерапевтски ефект.
Monday, June 17, 2013
Парфеми РЕФАН
“Парфем: мешавина од миризливи есенцијални масла и ароматични состојки, фиксатори и растварачи, составени за да креираат, модифицираат или разбудат спомени”
Добредојдовте :)
Добредојдовте на мојот блог :)
Уживајте додека и следите освртите на моите дневни парфемчиња и производи со уникатни мириси.
Споделете го своето искуство (ако го имате) или пак споделете ја мојата приказна со уште некој пријател. Би сакала да прочитам и други осврти на мирисите - од Ваш агол.